2020年5月20日 星期三

工作小感想(十四)- 最後一星期

下星期三就係小弟既last day。原本的確係有啲不安,畢竟我真係打算全職去攪好盤小生意,所以會無左份都穩定既主動收入。但,與其擔心,倒不如繼續進攻做好件事佢。

都有啲客叫我咪辭職之類,主要係講話我既商品並非必要品,經濟下滑云云。我係度都係講句super打和算,費事爭辯太多。點講好呢?小弟其實係想透過呢次辭職,重新去諗番自己真正想做既嘢係咩。學同做左咁多年技術,我係咪真係淨係可以做技術呢?又或者我仲有無其他可能性?我心入面渴望既嘢其實係咩?若果真係end up都係好想做技術,我又想追求啲咩既技術呢?簡單黎講,我諗既唔係淨係錢,而係我條命應該點活落去。如果我淨係想優化賺錢呢樣嘢,我唔需要辭職,繼續打住份無得輸既工 + 做小生意,已經係大部分人眼中既人生贏家(誤)。But,我諗既係再長遠少少既嘢。呢啲係咪叫中年危機?應該係。但,好彩我仲意識倒。係呀,可能會賺得少左 + 無咁穩定,但我似乎宜家最需要既唔係錢,而係探索自己想要咩。

下星期三就last day,我個垃圾上司當然繼續卒我。而,小弟又真係好勁OR好好彩咁做倒啲研發結果出黎。坦白講,最尾一個月做研發 + 交接,小弟已經做凸左好多,條仆街應該學識知足。若果佢依然唔滿意,小弟都唔fucking care喇!食屎啦佢!

2020年5月8日 星期五

生意小感想(七)- 繼續成長

先講下粉絲人數先,已經突破800人喇,大約仲有170幾人就突破1000人,希望6月底可以做倒。而,純利亦都係四月再創新高,兩人對分已經達到五位數字,再加上股息既收入其實都OK既。粉絲轉換成顧客既轉換率係19.5%,當中既回頭客率係34.3%。期望開拓新客源之餘,可以繼續堅固顧客既忠心程度。宜家有唔少客人都同我地講:「唔會幫襯其他鋪頭,淨係幫襯我地。」多謝先,但小弟亦都唔會天真到覺得佢地真係做得倒,但要係佢地口中聽倒呢句說話,係難得既!

小生意既快速成長開始俾其他行家注意倒,開始有行家惡意攻擊我地。果位行家不停對某位客人講我地壞話,而果位客人實在忍受唔倒佢既行為。將佢地既對話PO左上網,咁樣一傳十,十傳百,真係損人不利己,仲做壞埋自己既招牌,最攪笑係反而提升左我地既聲譽呀。所以,小弟係客人講到其他行家既問題既時侯,多數只會講我地唔會comment行家點做,免得落人口實。

黎緊仲有一個月就需要搬鋪,宜家係度積極搵緊好既鋪頭。到時希望可以有地lift,咁會更方便我地上落商品。同時,客人可以自己上門到我地鋪頭,而唔駛我地落黎開閘接佢地上鋪,希望咁樣可以再多啲客人上黎幫襯。不過,都係諗住搵細鋪,盡力壓低成本增強生存能力。

其實,真係唔係咩大生意,但見住成個系統慢慢成長,真係好L有成功感。相對於正職,呢盤小生意真係相對輕鬆。每星期開三日,每次開幾個小時,就已經有還算OK既盈利。就當開多一日,工作時間依然遠低於打工仔。可以既話,希望未來繼續專注係發展小生意 + 構思新生意度。至於技術研發方面,小弟唔係無興趣,但on9既老細太多,暫時會當係興趣咁發展。到最後生意失敗,破產收場,咁都仲有一技傍身,再投奔職場吧!

呢個小生意大約係一年前開始既,當時咩都唔識,可以話係新手一枚。到宜家去到咁樣,未算成功,但至少唔係失敗,多謝大家見証住小弟既成長呀!

2020年5月6日 星期三

工作小感想(十三)- 問下HR

多謝大家既答覆先,令我更加明白last day呢回事既細節。不過,為左穩陣起見,我都有再向HR請教清楚。得出既回應係:「打工仔隨時都可以遞辭職信,只要跟足合約既通知期,就唔需要老細既認可。相反,若果要延期就需要雙方既同意。」即係話:「我老細完全無權唔俾我走。佢講咩要滿足某d特定條件先俾走,係完全無跟到合約條文。」

再講一講前題先,小弟係完成左個project既mile stone先走既,客戶亦都驗收左無問題。而,下一個milestone係至少有半年時間去develop。即係話我係手上無新task既情況下走既,同時係時間上亦亦都絕對唔趕。

點知老細就發神經要我死掂未來兩個月既task先俾走。我宜家既諗法係:「我一定會照番通知期走,但係我都會幫手做下新task,做得幾多就幾多。」而,我呢兩日已經提供左個pipeline出黎,只係差implementation。到時,佢地只需要跟據我個pipeline繼續改進就OK。若果咁都完成唔倒,只係証明呢條team既能力真係好低。

過去既日子,小弟係付出左好多心力去做研發。但,老細唔識欣賞 + 唔記得我做過d咩。唔止一次問過我:「你有做過咩?」個人覺得佢連下屬做過咩都唔記得,真係好唔尊重。同時,佢連我做過咩都唔記得,我又點可能會係PA上會有好分數?一切都只係靠佢既印象,而唔係我做過啲咩嘢。表面上,話開放聽下屬意見,實際上就一言堂,鍾意下屬稱讚 + 認同佢。而,佢係我臨走前所表現出黎既小器,更加係令我完全失望。

走。

2020年5月4日 星期一

工作小感想(十二)- 辭職

係呢個時候辭職真係好勇,因為the worst is yet to come。但,小弟今日唔想講呢d嘢住,皆因我老細果然係一個仆街。 

是咁的,小弟因為WFH既原故,只能係上星期二以電郵方式表達自己既去意。而,last day係寫正5月最後一日。其實,通知期係凸出左一個月多啲啲,但我覺得俾多幾日出黎做善後都OK既,無謂計計較較。我亦都盡量寫得客氣 + 稱讚老細幾句,可謂已經盡量將成件事做得好好睇睇。遞信當日朝早老細同我傾左陣電話,主要俾我講下點解想走之類。但,果日既對話,佢無表達對我last day係邊日有咩意見。OK fine,咁就放假,事隔左5日就返左公司開工喇。

今日朝早HR就電郵小弟話要改last day日子,因為該日子超過一個月通知。而,呢位HR亦事前問了老細改last day日子係咪OK,老細既答覆係OK。所以,佢print左我份辭職信,叫我改左個ast day日子 + 俾老細簽名。既然HR同老細都覺得縮短通知期至一個月無問題,咁小弟亦從善如流即卡改 + 搵老細簽名,亦極速交番俾負責既同事。

到下午開會果陣,老細突然講話我要做哂接住落黎兩個月既嘢先俾走,仲多次強調話要滿足特定條件先俾走。坦白講,佢唔認同呢個last day日子,點解果陣朝早HR問佢係咪OK,佢又無問題?到我再搵佢簽名二次確認既時候,點解佢又簽名呢?更何況,封信已經遞左出黎足足5日,佢又點解一句聲都唔出?原本一切都好地地,你話延期都算,宜家竟然仲講埋話唔滿足某d條件,唔俾辭?咁樣會唔會太賤?太唔守誠諾?我什至想問:佢咁做係咪合法?

最後,想講:如果我走左,呢條team就唔掂,咁我會唔會太重要?攪到要做出咁核突既做法黎強留我死掂d嘢佢,當初識得珍惜下屬係咪會好d?

各位又點睇?

2020年4月26日 星期日

工作小感想 (十一) - follow your heart?

小弟雖然係個理科生 + 所謂既學術成績還不錯,但實際上份人並唔係咁理性,好多時什至要用感性黎形容小弟。近排真係開始重新思考JUST FOLLOW MY HEART呢回事。我的確已經唔太想再做呢份工,再做落去亦覺得前途唔太好。二來我又真係好想花更多時間去做小生意同籌備PhD既事,唯一阻礙我既就係CV好唔好睇既問題。

不過小弟呢兩年的確做得唔太開心。成日都要忍受老細同我講: "人地唔會俾啲做唔倒既嘢我地架!" 其實,話明做研發,又點會事前係知道做倒定做唔倒?如果事先已經知道,又點會係研發?仲要忍受明明POC都無,老細就答應客戶一啲極度苛刻既死線(例如一個月),總之就係答應答應答應。小弟想像中既技術領袖並唔係咁,而係對客戶講出有咩難點,從而推論點解需要咁多時間同埋資源。而,唔係發覺好困難,先同我地啲工程師呻: "啲客根本就唔識技術,啲要求亂咁俾既! " 到最後,答應完人地再違約真係正確既做生意方法咩?我唔知呢種係咩生意手法,但我一定唔會咁做。

我到宜家都唔太知可以點處理工程師 VS 技術主管之間既矛盾。小弟就覺得第一件事唔好同上司嘈,特別係果啲氹你話係條team入面咩都可以講既上司(誤)。每個人都要面子既,有個細既以下犯上,唔係個個都有胸襟去接納反對意見。小弟暫時認為最好既做法: 盡量用建設性既態度做事 + 搵定後路隨時走人。如果最後幸運成功,咪升職加薪。若果後尾愈做愈唔對路,就著草走人。做定兩手準備,呢樣就係點解打工仔唔會輸既原因。如果有追開我廢文既讀者,可能會發現半年前既我唔係咁講嘢,仲會好proud of自己會頂撞上司(誤)。但,宜家真係唔咁做喇,因為個系統係有利高層既人,佢地有權整死你 + 毫髮無損全身而退。所以,頂撞既話唔係唔得,但我既利益係邊度?不過,見倒有人仲會熱血頂撞上司,小弟都會默默欣賞佢地既衝勁既。但,又掉番轉頭咁諗,呢個人咁有衝勁,唔去創業真係哂左佢呀!

事情已經過左去喇。小弟都唔想再追究當中既是非黑白,都係向前望諗啲有建設性既嘢。反正,辭職信已經寫好,所以就遞硬信喇。唔少人遞辭職信都期待老細錯愕既果個樣,小弟曾經都有呢種所謂既報復心態。但,我深知一間公司無左邊個都會照常運作,都係慳番啖氣諗下未來下一步點做好過啦! 話自己唔理性,但end up又發覺自己寫左好多自己既分析同埋應對係入面 (誤)。

不過,好好跟隨自己既內心,係咪先係真正對自己長期有利呢?你又點睇呢?

2020年4月19日 星期日

工作小感想(十) - 四年打工感想

打工出份糧俾我,我就好有動力幫你工作?應該就唔係既。正如我老細每個月可能收緊6-7皮一個月,咪又係工作期間係度賣保險。講真6-7皮左右既人工,同各位比,真係蚊比同牛比既。但,純計番香港人既中位數收入,6-7皮都OK啦。不過亦剛好說明,出糧只能夠保証員工俾倒min. effort,就係保証你唔炒佢既effort。

又舉另一個例子: 明明小生意既每月所得純利,我同拍檔攤分都仲未到一個月既人工(咳咳,就係咁微不足道)。但我同拍檔,都係用左比起正職更多既effort入去。呢個究竟係唔係一個理性決擇呢?

普通人打份工係咪真係一分耕耘一分收獲先?表現好,經常OT想做好件事,係咪就一定升職加人工呢?小弟覺得未必係。打工既話,其實要同時面對內部同埋外部既不可控因素。內有上司眼光差睇唔準市場,部門賺唔夠/倒錢 OR 政治鬥爭落敗,幫唔倒你fight升職加人工。外有變幻莫測既市場,隨時一個sharp change就令唔少公司倒閉 OR 研發出來的產品市場反應不好。市場恆常變化,若果係因為大環境而被炒,小弟認命。但係若果因為內部因素而阻礙我晉升之類,又真係會覺得唔甘心。但,你話係咪相對穩定?係既。

另一方面,做小生意,內部真的變得更可控了,不可控的只剩下市場。大佬,我即使出盡奶力,都係輸到一仆一碌,咁我都心甘命抵呀! 因為我唔係因為豬隊友而輸呀,而係自己能力/眼光唔夠好呀。小生意變得更上軌道後,發展方向正確既話,所得利益又真係可以話一分耕耘一分收獲。我地呢行湊得掂D客,真係有感情,佢地往往好願意向其他人推薦你同埋返黎幫襯。可以話湊得掂一個客,就會有兩三個新客過黎,有D似雪球咁愈碌愈大。

講到呢度,做左四年左右既打工仔,近來又做左半年左右既小生意。我由一個熱血既小薯仔,初期真係仆心仆命為公司工作,成日OT想打好份工,想話俾人知我係一個有態度既人。到宜家我會覺得唔需要太有態度太俾心機去打工,因為我終於理解自己唔係呢個系統既主角,太將心力放係唔屬於自己既系統上,其實唔太化算。無話做生意定係打工,邊樣好D。從來都係適合你既就係好。若果無咩事業心,想平平穩穩,個人真係覺得適合打工。但係,若果你好似小弟咁鍾意爭強好勝,成日想搵D嘢証明自己,或許真係比較適合做生意。戴番個頭盔先,小弟亦都唔會話唔再幫人打工。相反,我仲會靠人地既系統去滋養我既生錢系統呀!

Anyway,近排公司頒左個inventor award俾小弟,好似值得拎出黎講下威下咁(誤)。不過,正因為專利果邊都差唔多攪掂,小弟都差唔多係呢間公司功成身退喇。

2020年4月15日 星期三

拍拖記 (一) - 傾下未來計劃

呢度好似無咩人會講下拍拖既嘢。不過,我JOIN既係投資圈子,大家黎黎去去都係講今日買左咩賣左咩,有咩分析,其實都好正常下,小弟學倒好多嘢。至於小弟既投資方法唔睇都罷,反正就係買REITS/公路股/電信股之類,製造現金流幫助生活更有保障,反正就是悶。黎緊五月會收五位數股息,期待一下先,應該會囉黎用係小生意上。小弟帳面的確蝕得好甘,但好彩無玩槓桿,所以日日都訓得好安樂,暫時繼續少做少錯政策吧。

今晚難得同女友出左去約會,無聊起黎就傾下未來計劃。我地一直都想試下係外國生活下既,未必講到要移民,但都想試下有幾年時間係果邊讀下書生活下,畢業後搵份工+做下小生意咁。若果真係唔掂唔適應,仲有得回流返香港,應該還好。生活有憧憬真好,即使現況不能算很好,但因為有希望能捱得下去,所以想記下今日講左D咩無聊嘢。

要出國,就一定要辭左宜家份工。坦白講,小弟認為呢份工確實無嘢值得我留戀,包括人同事,日日倒數緊幾時辭職,十四個星期後完約,接近每一個星期就REVIEW下自己係咪要遞辭職信(誤)。客觀上幫人打工既價值的確唔高,只係幫人地個系統運作,倒不如盡早辭職專心攪好自己盤小生意。趁年底前將粉絲人數增加一倍或以上,盡早提升客源從而提高每月純利。若果到時過左外國生活,呢盤小生意+股息應該都可以為小弟每個月提供五位數的收入呀。係呀,呢個數的確唔多,但至少個人的生活得到一定既保障。不過,可能有人話你宜家呢個時勢想辭職,真係好無謀呀!係呀,小弟的確幾灑脫既人黎,唔鍾意屈居人下,鍾意自由自在,鍾意自己話事,就俾我癲下啦。

另外,點解想辭職,係為左想專心報讀PHD呀。其實,報讀PhD之前要寫一個研究計劃俾心儀既導師既。而,呢個計劃雖然未來應該會變,但好既開始就係成功既一半,諗得愈詳細落地愈好。小弟什至乎想係搵導師申請前,已經有D結果俾人地睇下,一來可以証明自己既實力,同時亦都想增加自己成功畢業既機會。點解要做咁多準備?大家可能有所不知,PhD的確係好難的,要做倒有Impact既研究,除左拜師重要外,就係勤力同天份。我唔想浪費三至四年時間去產生一堆垃圾出黎呀。另外,係讀緊博士其間,仲會想同女友一齊攪檔小生意。如果呢個小生意做得好,又可以為自己提供第3個收入了。小弟預計大約俾三至四年時間左右佢上軌道。咁當我畢業之後,就有三個自己既系統 + 一份主動收入既工作。四個收入來源,應該好安全喇掛?聽起黎好似幾完美咁。不過都有D隱憂,例如非澳洲公民可唔可以係澳洲開小公司做生意呢?未來我地又可唔可以繼續留係澳洲呢?唔得既話,呢個小系統就要摺埋,咁真係幾可惜下。

大家俾D意見?

2020年4月13日 星期一

生意小感想(六) - 小生意之道

又過了個半月,更新一下現況。武肺的影響,導致小店不能正常入貨,這兩個星期有點在苦苦支撐,但營業額竟然突破了天際(誤),突破了同比新高。下個星期日有機會可以入貨,希望一切順利。現時的粉絲數已經突破700人,還有大約300人就到達本年度最高的目標。望見自己慢慢將客戶一個又一個吸回來,再成為忠粉,的確很有成功感。隨著粉絲數目不斷增加,生意真的愈來愈順利。以往要cold call,要不停在各公海page撈人,到現在簡單出一兩個PO已經獲得不錯的迴響。

近來,小弟花在這個小生意的時間愈來愈多。不停有客戶PM小弟問東問西。這其實是一件好事,問得愈多的客人愈容易得到他們的喜愛。透過一次又一次的幫助,來增加他們的信任度。記著各個客人的小小需要OR細節,暖心地突然伸出援助之手。這些小小的舉動,都是極級加分的。小弟什至乎在他們沒有花費一分一毫前,已經在嘗試解決他們的問題。個人認為生意之道不是在於他們給我錢,我才待他們好。而是,我先善意地接觸他們,先獲取他們的信任,然後賺他們的錢只是時間上的問題。善意,是小弟最核心的經營理念。在我心目中,生意是眾人之事,一件商品,一間實體店,什至乎一個專頁,只是一個媒介將人連結起來。而,加強這種連結的,除了實際上的供求關係,還有那種打從心底想幫助人的意念。那種意念,那種誠懇,其實客戶是感受到的。

所以,我絕對不會對客戶呃呃氹氹。有就有,無就無,絕不混淆視聽。騙了一次客戶,又讓客戶知道了,這種傷害無法彌補。這是我最痛恨上司L和T的地方。我要光明正大地做生意,要走和他們不同的道路!

最後,有些人可能見我經常鬧上司,會嘲笑我: "到你做了老闆就知道當中的苦處了。" 我現在終於可以比較有底氣地回答: "我已經是老闆,我的小生意在不停成長中,而且未來還會更強。苦?苦在哪?只有無能的人在上位,才會很苦,很有壓力。當大部分事情都可以由自己話事,天空海闊,樂事!" 一直以為自己只適合當個小小工程師。喔,原來我這種性格,這麼有主見,這麼執著想將一件事做好的人,也適合當老闆。

喔,忘了說: 小生意已經收支平衡了。寫得比較亂,但心中有好多感受想寫。會繼續努力,未來再向大家報告。

2020年4月10日 星期五

武漢肺炎之我見

武漢肺炎,又名新冠狀病毒。近來,有不少大陸人站出來說這個叫歧視。小弟覺得還好,香港腳之名,我們香港人還一直沒有出來伸冤呢(誤)。你話香港是否足癬的發源地?還真不見得。聽說香港腳的名字由來是源自「很多駐港英兵皆得此病,英國人才稱呼此病為香港腳」。同樣道理,武漢或許不是現時疫情的發源地。但,第一宗被發現的案例是發生在武漢,而且疫情曾經相當嚴重,更爆出逃亡潮。坦白講,令人印象非常深刻,難怪別人會叫做武漢肺炎。一個名字的由來,往往都帶點歷史因素在裡面。take it easy~

說回來,中國政府的確在起初犯錯了,錯在打壓說真話的人。但,後來勇於改正。若果數據是真實的,防疫的確比大多國家有效率,值得一讚。但,後來又誤導國人,說免費援助歐美國家。怎料又被人踢穿是要付費的,而且不少物資還是不合格。這...真的有點那個。中國已是強國,這是事實,少一點做下三濫的事情,別人會更敬重你。若果一個人又強大,又有高尚的情操,別人是能感受到的。簡單一句:做多了。

現時香港大市開始回暖也要歸功於中國的防疫做得好。對於中國,大家會有什麼想像?應該會假設中國正在慢慢復原至正常運作水平吧?這種憧憬自然會帶來大市的上升。而,美國?相比起華人的謹慎,白人的防疫意識十分不足。每天喊「都是中國的錯」,並不能防疫。小弟真不知是否中國的錯,才導致全國大亂,個人是傾向unknown。你硬要我說有或無,我只會覺得你on9。但,若果美國人真的想復仇,至少先讓內亂結束才槍口對外吧?重點就是隔離+勤洗手,就這兩點而已。白人,醒覺沒有?這次的疫情是全球性的,只有一兩個國家做得好是不夠的,必須要全球一起努力才能有效杜絕疫情散播。全球經濟早日回復正常,至少不再被疫情影響,相信是大家都渴望的事情吧?

2020年3月28日 星期六

3月月結 - 大跌市

這個月港股大跌市,相信不少人都損手爛腳。小弟的組合帳面損失了20%,可謂慘不忍睹。但,至少還是訓得食得,帳面上的損失對日常生活並沒有影響,影響日常更多的是近來的疫情。對未來,小弟自然是不太樂觀,即使疫情可以解決,還有百廢待興,更不用說中美貿易戰,而香港的政治運動也只是硬生生地被這疫情斬斷,而怨氣及不滿一直未解決。坦白講,近來政府對疫情的處理方式,竟同時惹來黃藍兩營的不滿。在這麼多重的夾擊下,香港可以有多好?anyway,小弟不打算調整組合了,免得多做多錯,只要這個組合依然能供給小弟適當的現金流便可。

工作方面,內部的評審終於完結,已經交給專利律師們file了一個patent,並準備提交給外部處理。另外,還有4個月就完約了,個人是傾向不續約的。一來可以花更多時間在小生意上,二來也想準備報讀PhD等事宜。但,若果上司L願意續小弟,而小弟又回心轉意,那就再工作一會去儲蓄更多資金吧。

生意方面,粉絲專頁達到635人,開始小有名氣,更有粉絲鼓勵我們成為龍頭。一直以為疫症並不會影響小生意。但,小弟錯了。現時歐美都停航了,硬生生截斷了小生意的運輸線。幸好,小店還有若干商品,否則就要硬食租金了。但,情況也不算樂觀,頂多只能堅持到四月底左右。幸運的是,小生意的本質就是日常經營成本低,所以即使是worst case,也不會損傷慘重。


2020年3月8日 星期日

生意小感想(五) - 粉絲專頁突破500人了

很久沒有在這裡更新一下近況,現在寫寫文章刷一下存在感。話說今年的粉絲目標人數是450人左右,想不到的是2020年只過了兩個半月已經達標了。設定450這個數字的原因是:2019年底的粉絲數是150,450就剛好是3倍,個人感覺算是不錯的增長。但,現在看來是過於保守了。現時就希望每個月增長100位粉絲吧。那麼,年底前就應該突破1000人了。

為什麼我總是在談粉絲人數?皆因它算是一個指標,我不清楚其他行業將粉絲轉為顧客的轉化率是多少。但,在我這一行大約是10-15%的水平,即若果有500人粉絲,那麼大約每個月就會有50-75人光顧。當然,絕對不會是線性這麼簡單,即不是粉絲數目愈多,顧客光顧量就線性增加。我亦相信應該會有飽和點。但,在此之前,繼續向前吧。做生意和打工很不同,一定要不停奮進。逆水行舟,不進則退,是做了生意後比較深的感受。而且,每次臨開鋪前都會在想:「顧客不來的話,怎麼辦呢?」但,比起打工,我真的比較享受。的確是依然會跟拍檔吵鬧,互相指責,有時真的比較激心。BUT!做生意的控制權真的遠高於打工,覺得拍檔on9(對唔住,講左粗口)又可以直接對他說,而不用顧慮太 多。在職場上,我有不少時刻都覺得老細好智障,但又不能直接指出其智障之處,真的隨時忍到內傷呀!

做了生意後,打破了不少對做生意的心理障礙後,反而開始想還有什麼生意可做呢?會不會有一天,我真的可以完全擺脫為他人打工呢?這值得令人期待。