2021年9月25日 星期六

咁樣睇收息港股

巴菲特有句名言:「用還不錯的價錢買下好公司,遠比用便宜的價錢買下還不錯的公司來的更好。」

香港係現金流投資者既良地,收息退休處於一個相對有利既狀況。香港本身無股息稅,相比起英美等地已經好好。但,唔少港資只係屬於唔錯既公司,主要係缺乏左價值增長既元素,而單單呢點已經唔算係好股。縱然有好多好優質又收入穩定既資產,亦只能判定為唔錯,亦因為咁只能好低價咁買。唔少人都話港股難玩,講白啲就係將「唔錯」當係「好」,講白啲就係個價入得唔夠低。以為已經好低,點知低處未算低(誤),繼而賺息蝕價,不過點都好過蝕息蝕價既。近排唔少人揸住阿里巴巴/騰訊蝕到入肉,呢兩隻股接近唔派息。若果股價一直唔變,唔知係咪要收番果啲啲股息30-40年先回本呢?當然只係講笑,股價又點會唔變呢?

唔少人話港股有波幅無升幅。撇除政治因素,其一原因係唔少收息股價值增幅有限,難以大幅提升股價。舉個例子,收租股單靠收租作為主要收入,而租金升幅大多跟通漲。咁既情況底下,最多咪當股價可能只會跟番通漲咁升。拉長十年咁睇,股價咪可能會係通漲既複利率咁升(頂盡),咁閣下覺得可以升倒幾多呢?但,一出大事,如社運或肺炎,就會出現panic sell。而唔係風平浪靜果陣以正常股價買入,再expect可以財息兼收,呢種操作通常最易出事。再講,既然打算投資收息股,又點會expect爆升呢(R哂頭)?正正因為股價缺乏摧化劑但同時敏感於社會局勢,為左更好保障自己,唔少收息港股只能係有足夠安全邊際先好買入。而,買入大跌價後,亦唔建議期望賺價差,反而記住宜家買既係安全邊際,再下跌既幅度會相對係和平時期更少,咁樣會坐得穩好多。收息股難玩之處,特別係港股,在於要睇透收息股之特質,從而擺正自己既期望,再扭正番自己既思維,自然會有較合理既操作。

2021年9月23日 星期四

俾電台訪問

做小生意做到可以俾電台邀請做訪問,算係營業額以外既另一個交代。坦白講,再次肯定左小弟既努力。最緊要係呢啲係public sector,有聲音紀錄可以擺落自己既履歷度。正!

又錯價

呢排一定會好亂,一定好高機率出現錯價,因為中央就係要趁肺炎,就係要趁社運無法啟動其間,快速set好自己手牌。到疫情完結時,一切已成定局。係「新香港」仲未有明確定位之前,唔少人包括小弟都會覺得香港既前景好L唔明朗。再加上中央一出招,就會有唔少KOL話香港已經玩完,再繼而一定有唔少人聽完呢啲說話,被洗腦就會panic sell。

BUT!香港既核心就係地少人多,未來十幾廿年亦只會繼續地少人多。人口密度高,落街買嘢好L方便,依然會係香港既特質。即使係「共同富裕」既大前題之下,呢個假設係依然生效。係呢種情況下,市中心既旺鋪同辦公室又或者圍繞住宅而建既商場一早插哂旗,呢方面既租務收入係非常穩定。而,未來中央話要地產商協助解決樓宇短缺問題,可以預期既係新興建既住宅周圍又會出現一堆商場。地產商係賣樓度可能會賺少啲,但轉過頭咪透過租務慢慢賺,到時租金又轉嫁番俾消費者。實際上,只係將短期內應賺既錢,攤番開慢慢賺番黎。香港人,世世代代都係地產商既搖錢樹(誤),呢種宿命即使係「共同富裕」底下依然唔能夠打破。

所以,根據以上睇法,呢幾日小弟又出手喇。

2021年9月19日 星期日

不跟別人討論持倉

睇黃國英某個專欄,曾經提及某位交易名家alexander elder。當中提及十點自律交易者既法則,詳情各位可以望下自律交易者的十個法則

其中有一點,小弟頗為認同,就係唔好同人討論自己當下既持倉。不停咁講自己既持倉又有咩用呢?係咪講多幾句,就可以賺多幾%?係咪講多兩句就蝕少啲?個人亦曾係blog度寫低自己既投資組合,但坦白講記錄呢回事可以私下做,無咩必要公諸於世,而小弟依然日日私底下做緊planning。相反,人地一句半句閒言閒語,隨時會影響自己本來步署好既投資策略。什至乎獨自考慮完整套計劃,係應該只專心咁完成自己既投資計劃。閣下最清楚自己既需求係咩,睇得愈多人地既持股,隨時又心郁郁咩都想撈下,又再次打亂自己陣腳,咁樣真係叫有記律既投資者咩?

個人認為連回報率既公開都可免則免。大佬,閣下又唔係KOL,亦唔係基金經理,心知肚明知道自己忠實實行左原本既計劃已經足夠,到最後回報率某程度唔係自己決定倒,而係成個市場決定。正數也好,負數也好,要做既永遠都只係檢討,而唔係去公開自己既回報率。呢個舉動可以話係坦誠佈公,但亦係無謂既誠實。什至乎,個人認為因為投資回報唔好,停低一下唔寫blog,消失一排亦係正常不過既事。因為,係呢個時候係最需要冷靜落黎,靜靜思考既時刻。相反,為左公開而公開,只會徒添自己既壓力。閣下,需要交代既,one and only one,永遠都係自己。

不過,喜歡將自己既組合+回報率放哂上網,認為咁樣有助於自律既,係應該繼續咁做既。但,個人剛好就對呢樣嘢持相反意見咁解。

2021年9月18日 星期六

借貸呢回事⋯⋯

近排恒大爆到咁,仲見倒有人話要價值投資撈番個底先,笑L左。小弟唯有講句:「祝你好運。」若果賺倒,的確係抵閣下賺既。小弟知道有位blogger係靠恒大一注獨贏,從此財自。唔知佢望見宜家恒大咁既景況,又有咩看法呢?

係呢個低息年代唔少人就話借得就借,係風起時當然漲得好快,但風停時亦跌得好急。小弟唔係話唔應該借貸,但個人取向最多只會借到淨資產既30%水平。二至三年前有啲人笑尻本地地產商作風保守,睇下內房成長得幾L快,股價升得幾L快。但當潮退時,就發現本地地產商既財力幾咁雄厚。係大陸管治之下,本地地產商或者會賺少左,但倒閉既風險,資不抵債既風險係好低好低。佢地捱過社運,捱過肺炎,什至可以講呢啲傷害根本唔入肉。從防守性而言,小弟唔係講緊個股價,而係從生意人角度去睇,呢啲資產一定係優質既,問題就係投資時買入價夠唔夠低而已。內房就如同年輕人一樣,想極速致富,去到好盡好盡,但亦好易收皮。本地地產商就似中年人已經賺夠錢,最風光既時段已過,作風自然慢慢保守。小弟自問投資向來保守,見倒內房既投資風格同自己咁唔同,自然唔會選擇。而,正正係小弟呢種風格,賺大錢無我份喇,但唔輸已經係贏,淨資產的確係一步一步慢慢增長中。

恒大呢次事件,令小弟反省既係:「借唔係問題,但唔好借凸。借凸左就算喇,最緊要確保自己有能力去杠桿。若果唔確定,就唔好借凸。玩死既只係閣下架姐。」 

2021年9月17日 星期五

選錯邊就會萬刧不復

近排移民潮興起,但又有啲人企出黎話要小心唔好選錯邊,否則萬刧不復(近乎恐嚇既語氣)。小弟就當佢地呢啲係良心建議。講真,移民的確係容易出事既。現金流問題,搵唔倒工,融入唔倒社會,blablabla...

講到尾,小弟認為都係歸納做一個問題:「閣下係香港係咩位置?」細細個睇男兒當入樽(slam dunk),安西教練曾經咁樣同流川楓講:「你去美國打波唔係唔得!但你要首先做左日本第一先!」佢大致意思係:「屌!你連日本第一都做唔倒!過到去美國應該都唔大機會有好發揮。」同理,今日唔少香港人想移民外國,不如都問下自己係香港屬於邊個位置。

幾個問題,可以諗下

1. 平時打工果陣,閣下係咪係同事之中屬於比較叻果個? 平時PA果陣係囉開咩評級? 香港人咁L鍾意返工,若果閣下係香港打工評價唔錯既話,去到外國相信亦唔會差得去邊。

答:

小弟除左第一份工PA囉C之外,其餘都係B-A。最攪笑既係,當年第一份工辭職果陣,CTO特登搵小弟傾計,話可以調我過去新加坡分部做嘢 + 讀PhD架。所以,唔知點解囉左個C,但又俾人咁樣挽留。讀PhD,即係話公司至少要係我身上投資80-100萬左右既資金 😂 ummm...小弟只係一個囉C既人,值得咩?

2. 有無試過自己做生意?做生意既純利,夠唔夠養活自己?學誠哥咁講,做生意等同做人。除左啲加減乘除既book keeping外,大部分都係同做人有關。份人有無誠信?性格夠唔夠大而化之?夠唔夠了解人心(即市場)?做生意OK既人,通常做人唔會太差。而,份人唔差既話,去到當地識朋友亦都唔難。

答:

大家都知我靠生活養活自己加再投資,每個月投資2-3萬唔係問題,但唔多講喇。但,小弟係創業兩年期間,多次有人提醒我「誠信」兩個字,獲益良多。又要有原則有誠信,同時又唔得罪客人,其實係唔容易,呢啲叫做事既手腕。

3. 閣下心儀既國家既平均淨資產係幾多?閣下既淨資產同當地既平均數比較又如何?呢個係衡量閣下既財力夠唔夠應付當地既生活費。通常愈富有既地方,平均淨資產亦愈高,物價亦都會愈貴,反之亦然。

答:

英國人既平均淨資產係80500英磅,而小弟不才都算係一個小資族,幸運過倒呢個數。而,計過數,係英國生活又的確平過香港唔少。再順帶一提,香港人既平均淨資產係391萬港幣。可想而知,啲物價係幾咁高。而,香港既物價就係貴係樓度喇。

4. 閣下有無現金流收入?如有既話,又可以cover倒現時生活成本既幾多%呢?應該都無咩地方貴過香港既生活成本(衣,食,住,行)。基本上,cover倒70%或以上,過到外國都唔會太辛苦,又或者至少唔需要即卡搵工。

答:

小弟唔計住呢個成本(屋企有樓),已經係生活成本既1.27倍,算係叫半財自。若果計埋住,就大約係0.73倍。唔係話一個好好既ratio,但都至少meet spec。

結語:

1. 上面幾個問題,小弟當然係會meet spec,因為呢啲問題都係小弟考慮過自己有無呢個資格移民既幾個關鍵問題。咁你呢?

2. 果啲人既意思係:「拿,宜家中國咁強盛!你走左就on9喇!」我反而想講:「一個叻既人去到邊都係叻。若果一個人要靠國家強盛先可以發圍,咁呢啲人多數唔係叻果批黎,反而更加似既係技安身邊果個小夫。時勢當然造英雄,但英雄亦都造時勢呀!」仲有,唔係個個人都認為人生需要不停向上流,把握當下果種小確幸既人生都唔錯呀。

3. 移民本身可以係同政治立場無關。例如:本人認為香港呢個地區既財自難度unnecessarily咁高,真係無咩興趣花咁多心力時間係上面。就正如,我覺得呢隻game太難唔岩玩,quit左佢玩第隻game都唔得?下下都上崗上線,無限批鬥,咪黑人憎囉。

2021年9月13日 星期一

我的窮L女友

女友同我既性格上真係極之唔同,佢由細到大都唔L理財,而小弟大學未畢業已經覺得要為自己退休安排。長年累月之下,個人既淨資產係佢既5-10倍,而女友只係同我相差一歲。 唔係想笑佢,而係想講思維唔同,帶黎既結果會好唔同。小弟間唔中都會口賤恥笑佢:死窮L(誤)。用「原來有錢人都這麼做2」既公式計算,即預期淨資產 = 年齡 x 年收入 x 0.1。若低於預期淨資產既一半,就屬於超遜理財族,俗啲咁講即係窮L。 淨資產係預期值既兩倍或以上,即屬於超優理財族。兩者之間則屬於普通理財族。不幸地女友係屬於超遜理財族既水平,小弟屬於普通理財族而已,大約係預期淨資產既1.3倍。雖然分類簡單粗暴,但都有佢既道理,皆因處於1.3倍既小弟,已經處於easy mode(即唔打算生小孩 +雙親有樓)既半財自狀態。若果處於2倍既時候,已經基本財自。在下有朝一日,一定會晉身超優理財族既行列!

係小弟不停咁對佢發表自己既偉論,話現金流投資法就如同有一個影分身幫自己工作,話儲錢係好L緊要架,咁樣去移民既成功率先會高好多,blablabla...經常性轟炸之下 + 某啲契機,佢慢慢開始投資,開始儲錢。不過,佢同小弟唔同,主力投資科技股。講真,係佩服佢既,亦覺得佢既投資選擇好合理,因為以佢既年齡,配合佢果份淨資產,係低到好L唔合理,所以係要搏啲換取更高既回報,而佢既投資回報的確係高過小弟唔少。期待佢有朝一日笑番在下係死窮L。以上評論係再次說明:「小弟認為投資取向係應視乎實際既理財需要,而唔係一味叫人用同一套心法。」而,小弟暫時只有興趣打easy mode,現金流投資法,有數咁計,靜靜雞咁贏,就OK喇。

其中一個係小弟認為有必要重點教育佢既概念,就係借貸。佢係好L根深蒂固咁認為:借錢就係唔好,借錢就係理財不善。佢聽倒在下想透過以MPF作抵押問家人借貸作為移民保障,就認為非常唔好。個人反而認為有咩借貸條件會優質過向自己既家族借貸呢?零息+超長還款期,點睇都係好貸吧?問銀行借貸買樓也做不到零息貸款吧?同時,差唔多已經還清一筆貸款,再借另一筆貸款亦都好合情合理。最緊要就係:「借得就要還,因為還唔倒錢一來好L無面,二來保持良好借貸記錄,下次咪可以再問佢地借(誤)。」再講,宜家唔少香港青年人都係靠父幹,叫爹娘俾首期上樓吧?功利啲咁睇 +撇開100%白手興家既無聊幻想,好好運用家族既資源,進一步向上流,亦都不為過。誠哥,巴菲特,比爾蓋茨等等超級富豪,睇佢地既自傳,絕對可以睇得出佢地係善用家族資源既人。丟番轉咁講,任何肯借貸俾自己既人,都應學識對其感恩並信守承諾,將資金慢慢還番俾佢地。

2021年9月10日 星期五

100萬營業額

岩岩創業果陣仲幻想緊有無機會達到一百萬既營業額,對各位黎講可能只係一個睇唔上眼既數字,但對在下黎講係一個里程碑。上年差啲成功,今年只係過左八個月就已經達到目標,係宜家呢個環境算係對得住自己。呢次經驗話俾我知,原來自己唔駛依附大企業都生存倒,亦講緊自己可以行既路比一般人既路更闊。

個人出黎全職創業,其一原因係已經好L厭惡無能上司(s)既擺布,日復日跟從一啲無謂既指令只為左係職場上保留一席之地,賺取定額既收入。其二係人生好短暫,唔試下自己既能力,點知自己係OK定只係一件人型廢物,亦唔想自己既人生係白過。見倒大部分人做打工仔幾安穩,一份工可以做5-6年,什至成世都係做打工仔。見倒呢個現象,都會懷疑自己:「係咪我先係有問題果個?點解其他人打份工就無我呢啲問題呢?我係咪單純只係一個loser,只係識抱怨,但真正自己創業就好L失敗?」以上既懷疑係合理既,創業係少數人先會做既事,而大部分人都會選擇打工。即係自己既行為至少係adnormal,而呢種adnormal係好定壞,只有做出成績果刻先知道。今年呢張成績表,已經達到個人期望,預計年營業額大概係150-160萬左右,對自己既疑慮算係釋懷喇。但好可惜,小弟要走喇,見証唔倒自己既心血超越200萬,什至300萬果刻。呢個創業遊戲要留到去英國先可以繼續玩落去,希望會見倒有200萬,什至300萬果刻,諗起都興奮。

2021年9月7日 星期二

選好UK頭一個月住宿

頭搖又尾擺,飄移境界。講真,之前真係唔Q知選擇酒店定Airbnb好。Airbnb中伏機會大,但平啲又有廚房,酒店係貴啲但會企理啲,可以話各有好處。直到⋯⋯知道左Airbnb可以隨時cancel閣下既booking,三個月book好?無L用,話cancel就cancel。其實唔少業主都係打算透過係Airbnb做短期租約黎等長期租約,長期租約一到,計埋賠償都有賺咪cancel閣下既短約。係咪好無誠信,um⋯⋯可能係,但從賺錢角度黎講係合理。

所以,到時去到UK,拖住幾件行李先發現俾人cancel,真係企左係度。本身移民已經好多嘢predict唔倒,但都盡可能係安排中俾多啲自己確定感。所以,同女友商量過後,都係book平價酒店先。係無細廚房架喇,到時唯有入多啲即食既食物,盡快係1-2個月搵倒個適合自己既落腳點吧。同埋,記得俾多千幾book啲可免費取消既酒店,對自己多一份保障。

2021年9月4日 星期六

睇Harry Potter

唔知道有幾多人鍾意睇harry potter?我應該都算係fans,証據係至少睇左2-3次成個系列,不過都係睇中文版。就黎去英國喇,想浸下英文,今次買左本英文版黎睇。初頭以為自己英文咁屎,所謂屎係指自己淨係識academic英文,因為工作需要一直要睇啲research paper,但啲日常用語其實真係唔L識(誤),一定係咁查字典啦,點知一日就掃左50頁。咁當然唔係我英文好,而係第一集既英文相對簡單,但難度會隨住集數上升。個人今次嘗試就唔再特登抽啲單字黎背喇,主力就係靠睇多幾次啲生字,從而認住佢地既意思/用法。以前學中文都係咁架姐,無話特別去背所謂生字。

小弟以前中文成績算係唔錯,band 1學校年年考十幾名,有次仲考埋第一名。背下書呢啲自然就要架喇,不過個人覺得成日睇中文書又真係有用架,而當睇到一定程度,就會由量變質,凝聚出自己既一啲見解同世界觀,對寫作,閱讀理解同小組討論都有啲幫助。唉,又港仔性格,做某樣嘢背後都係為左功名。

2021年9月3日 星期五

財不入急門

由細到大除左鍾意食嘢飲嘢之外,都無咩慾望。計下數,個人係好大機率財自,基本上唔犯大錯就OK。推想至此,財務態度變得唔需要太進取,過去亦曾嘗試借貸投資,但淨借貸率亦只係20-30%左右。不停去桿杠之下,宜家減到得番4%左右(誤),見倒上年唔少人要斬倉,基本上係從來無想像過發生係自己身上。上年既帳面的確係錄得負雙位數既回報率,不過由於持貨力OK,反而增持左唔少REITs同收息股,今年升番唔少。唔計帳面利潤,單單運用更少既資本獲得更好既現金流,已經係唔錯既收獲。有啲人話其實現金keep係大股東度同係你度都係一樣咋嘛,佢地可以再發展,呢點係事實呀。但,收番啲股息,就可為自己提供多一個degree of freedom去作出投資決定。各有好處,睇閣下既投資取向係點。不過,買啲咩股票都好,都係萬變不離其宗:「選啲有護城河既。」

近排都係等緊下次黑天鵝事件中⋯⋯呢幾年咁亂,出現錯價既機率愈黎愈高,而未來亦有機會愈黎愈亂。分散投資(至少地域上)+ 再平衡等等呢啲基本招式,變得愈黎愈重要。好好做埋最後4-5個月生意,儲下股息,慢慢回血中⋯⋯最後,想吐嘈下用「回報率」判斷投資對錯呢回事。如果跟據以上規則,上年既個人回報率係負雙位數真係「好L錯」。但,個人留守 + 增持到今年賺番唔少,咁睇既話上年既投資動作又似係岩番。笑L左,我都係比較認同鉅哥果句:「股價我地控制唔倒,但我地交既係業績同現金流。」 回報率當然都重要,但個人認為睇1-2年係無咩代表性,或者應更關注既係profolio中既quality of earning,盡量留低tier 1既資產,而唔係tier 2 或者更次既資產⋯⋯長遠會比較大機會贏。

以上既投資諗法都係由個人需求出發,絕不客觀。謝謝。